Deputeti i Partisë Demokratike, njëherësh anëtar i Komisionit të Rithemelimit, Belind Këlliçi ka reaguar pas sulmeve që kryeministri Edi Rama i bëri sot SPAK ku i kërkoi të hetonte Berishën dhe Metën.
Në një deklaratë për mediat, Këlliçi hodhi akuza se sulmi i tij është mesazh i koduar ndaj SPAK që të tërhiqet nga çështjet që prekin Ramën dhe njerëzit e tij duke e konsideruar si vepër penale. Sakaq, në një deklaratë për mediat u shpreh se kohës së Edi Ramës i ka ardhur fundi dhe se sot sulmoi SPAK për hallet e tij.
“Edi Ramën e ka kapur frika, ka disa hetime ndaj tij jashtë shtetit. Sulmi i tij është mesazh i koduar ndaj SPAK që të tërhiqet nga çështjet që prekin Ramën dhe njerëzit e tij. Kjo në botën perëndimore konsiderohet vepër penale dhe dënohet rëndë. Sulmi i tij i sotme është treguesi se Ramës i ka ardhur fundi. Ai kryeministër që kyç gojën përmendin si favorizues një ministër të brendshme të tij dhe sulmon SPAK kur pritet që të ketë arrestime të tjera brenda kabinetit të tij. I vetmi turp i SPAK do të ishte nëse i nënshtrohet dhunës së kryeministrit. Turp do të ishte që Rama dhe qeveria e tij të mos ndëshkoheshin”, tha Këlliçi.
