Kryeministri i Shqipërisë zhvillon bisedë telefonike me homologun e tij grek, Aleksis Tsipras
Kryeministri Rama ka paralajmëruar sot intervistën që do të japë për gazetarët grekë në televizionin “Sky”. Përmes një
mesazhi në rrjetet sociale, Rama ka theksuar se shpreson se do të mund të përkthehet në shqip, nga TV-ja greke. Kryeministri do të flasë për marrëdhëniet shqiptaro-greke, të tensionuara kohët e fundit.
Kryeministri Rama do të flasë për Çështjen Çame, ku pritet të ritheksojë qëndrimin e palëkundur të shtetit shqiptar për të kërkuar nga pala greke zgjidhjen e Çështjes Çame bazuar në Konventën e të drejtave të njeriut. Kryeministri pritet të flasë, për marrëveshjen e ujrave me Greqinë, por edhe për debatin për Himarën.
Sonte, në ora 22:00, kreu i qeverisë shqiptare do të jetë përballë gazetarit, Alexis Papahelas dhe tre kolegëve të tij për të folur për të gjitha çështjet e pazgjidhura mes palës shqiptare dhe asaj greke.
Ndërkohë Rama i ka telefonuar homologut të tij grek, Aleksis Tsipras, ku është diskutuar për nevojën e bashkëpunimit, në interes të qytetarëve të dy vendeve. Bisedën telefonike mes dy kryeministrave e ka raportuar televizioni shtetëror grek ERT.
Televizioni shtetëror grek sqaron se biseda telefonike është kryer me kërkesë të kryeministrit shqiptar dhe se dy udhëheqësit kanë theskuar rëndësinë e përforcimit të marrëdhënieve dypalëshe, për interes të dy popujve, por edhe të rajonit në tërësi.
Sipas ERT, kryeministri Tsipras i ka dhënë rëndësi faktit që pala greke mbetet e angazhuar në këtë përpjekje, por ka theksuar se veprimet e kohëve të fundit dhe retorika nacionaliste në rritje minojnë konsolidimin e një klime të mirëbesimit të nevojshëm për ecurinë e marrëdhënieve dypalëshe. Në të njëjtën kohë, ai ka vënë në dukje nevojën për të gjeneruar me hapa konkretë rezultate konkrete në bashkëpunimin mes dy vendeve, fakt për të cilin Greqia ka nisur një seri iniciativash.
Tsipras ka theksuar gjithashtu se mbrojtja e të drejtave të pakicave etnike greke përbën një çështje kryesore për marrëdhëniet midis dy vendeve, por edhe një kusht themelor për ecurinë europiane te Shqipërisë.
ERT nuk ka dhënë asnjë detaj lidhur me çfarë ka thënë kryeministri Rama në këtë bisedë telefonike. Këtë do ta mësojmë në intervistën që do të japë për median greke, SKAI, ku pritet të flasë për të gjithë problematikën në marrëdhëniet mes dy vendeve.
