Kryeministri Edi Rama ka bërë sot publike një sipërmarrje të re të qeverisë për t’i dhënë mundësi qytetarëve njoftimin për dëmet që mund të kenë pësuar nga tërmeti.
Rama tha sot se ka vendosur ta vërë platformën “shqipëriaqëduam.al” në shërbim vetëm të qytetarëve të prekur nga tërmeti. Gjithashtu Rama tha se përmes kësaj platforme do të marrin përgjigje vetëm ata qytetarë që kanë shqetësime nga tërmeti apo ata që duan t’i ndihmojnë, dhe jo ankesat e tjera të qytetarëve.
“Ne kemi vendosur të ndalojmë platformën e bashkëqeverisjes, gjatë kësaj gjendjeje të jashtëzakonshme. Që nga dita e sotme, në platformën “shqipëriaqëduam.al” shqiptarët mund të adresojnë të gjitha shqetësimet e tyre për tërmetin dhe menjëherë ekipi vihet në lëvizje për t’iu kthyer përgjigje. Për sa kohë do zgjasë emergjenca, nuk do kemi mundësi t’iu përgjigjemi qytetarëve për problemet e tjera, përveç tërmetit. Unë do bëj çmos bashkë me ministrat që të mos bjerë ritmi. Kjo është një faqe e dedikuar për të gjithë njerëzit e prekur nga tërmeti dhe ata që duan të ndihmojnë të prekurit”, tha Rama. /abcnews.al
