Pas vendimit të Gjykata Kushtetuese, e cila la në fuqi masën e pezullimit nga detyra të zëvendëskryeministres Belinda Balluku, duke rrëzuar kërkesën e kryeministrit Edi Rama, ka reaguar Gazment Bardhi, kryetar i grupit parlamentar të Partia Demokratike.
Përmes një postimi në rrjetet sociale, Bardhi u shpreh se “alibitë tashmë kanë rënë”, duke deklaruar se përpjekjet e kryeministrit për të ndikuar mbi Gjykatën Kushtetuese dhe për të mbrojtur veten dhe Ballukun kanë dështuar. Sipas tij, vendimi i Kushtetueses tregon se drejtësia nuk mund të bllokohet përmes presioneve politike.
Bardhi theksoi se tashmë nuk ka më arsye për vonesa dhe se kërkesa e SPAK për arrestimin e Belinda Ballukut duhet të shqyrtohet urgjentisht nga Kuvendi.
Reagimi i Bardhit:
Alibitë tashmë kanë rënë!
Edi Rama ushtroi presion të paprecedentë mbi Gjykatën Kushtetuese dhe ngriti alibi absurde për të mbrojtur veten dhe Belinda Ballukun. Të dyja dështuan! Edi Rama u rrëzua në pretendimin e tij për të bllokuar drejtësinë. Njëlloj do të rrëzohet kushdo që pengon drejtësinë.
Tani, Edi Rama nuk ka më ku të fshihet. Kërkesa e SPAK-ut për arrestimin e Belinda Ballukut pret miratimin nga Kuvendi. I bëj thirrje Kryetarit të Kuvendit të njoftojë menjëherë mbledhje urgjente të hënën të Këshillit të Mandateve dhe përfshirjen të enjten në seancë plenare të kërkesës për dhënien e autorizimit për heqjen e imunitetit për ish-Zëvendëskryeministren dhe ish-ministren Belinda Balluku.
Kuvendi nuk mund të mbajë peshën e përgjegjësisë për vonesën e paprecedent të shqyrtimit të kërkesës së Prokurorisë dhe për pengimin e drejtësisë.
Koha e manovrave ka mbaruar!
