Kryeministri Edi Rama gjatë vizitës së tij në Amsterdam ka bërë një bashkëbisedim në qendrën e mirënjohur “De Balie”. Ai foli për politikën, të ardhmen europiane, por edhe për pasionin e tij për artin.
Duke u ndalur tek kjo e fundit, kryeministri nuk kurseu as “komplimentet” ndaj vetes dhe postit si Kryeministër duke e cilësuar veten si “Numër 1 në botë”.
“Nuk ka të bëjë me se çfarë preferoj unë, unë jam kryeministri më i mirë mes artistëve dhe artisti më i mirë mes kryeministrave, unë jam numër një në botë në këtë gjë. Në një mënyrë apo në një tjetër, të pëlqen të jesh numri një, si ai që fitoi maratonën e që ishte i vetmi në garë, kemi shumë raste të tilla. Mendoj se ka lidhje me mënyrën se si na ka ardhur jeta. Ju më thatë me shumë mirësjellje se kur nisa këtë karrierë kisha të gjitha flokët e mi, i kisha të zeza, kisha dhëmbët natyralë, tani jo më. Më vjen keq që po ndaj disa detaje intime me ju”, u shpreh Rama.
