Kryeministri Edi Rama ju referuar disa statistikave policore kur deklaroi në Kuvend se sipërfaqja e mbjellë me hashash është shkatërruar në 96 për qind vitin e shkuar, ndërsa theksoi se në vitin 2013, është shkatërruar vetëm 7%.
Sipas kryeministrit, Kutia e Pandorës është hapur për shkak të debatit publik për të. Kryeministri vlerësoi edhe ministrin e Brendshëm për luftën ndaj këtij fenomeni, ndërsa pat një “thumbim” edhe për ish-kryetaren e Kuvendit, Jozefina Topalli.
Rama: Në vitin më të mirë të qeverisë së Partisë Demokratike, sipas Guardia di Finanza është shkatërruar vetëm 7% e sipërfaqes së mbjellë. Shikoni tani se si rritet hashashi një vit më pas kur ministër është kryetari aktual i Partisë Demokratike. Bazuar në shifrat e Guardia di Finanza, 7% sipërfaqe e shkatërruar në vitin 2013, 96.4% sipërfaqe e shkatërruar vitin e kaluar. Kujt ia tregoni? Ndryshimi është se nëse ne kemi shkatërruar në vitin për të cilin fola disa herë më shumë, ne e kemi hapur kutinë e pandorës. Nuk e kemi mbajtur mbyllur, për të bërë menaxhimin politik të parcelave. Lazarati ka qenë i menaxhuar politikisht. Ka qenë banka e madhe e parasë së zezë, që ne e shkatërruam. Ndërkohë që parcelat e tjera, për të cilat ne akuzohemi, ka qenë të menaxhuar politikisht.
E fundit fare, po ju them; e di kush është ndryshimi tjetër. Këto faktet tregojnë që kultivimi është spostuar në thellësi. Nuk është më siç ka qenë, haptas kudo dhe nuk flitej për të. Nuk bëhej më debat për të se mbahej mbyllur në këtë kuti pandore që ne e kemi hapur dhe e përballim sy më sy këtë fenomen që është i lidhur me një sërë aspektesh. Është fenomeni që për herë të parë po luftohet seriozisht në Shqipëri që kur erdhi kjo qeveri dhe që kur në krye të Ministrisë së Brendshme u vu ai ministër atje. Flisni këtu për hashashin sa të doni, por kur vriten policë nga zona juaj të paktën shkoni në varrim.
