Kryeministri Edi Rama po merr pjesë ne Samitin e krerëve të shteteve dhe qeverive të Aleancës së Atlantikut të Veriut, në Varshavë të Polonisë.
Në cilësinë e vendit anëtarë, Shqipëria po përfaqësohet me një delegacion të nivelit të lartë, që kryesohet nga Kryeministri Edi Rama, me pjesëmarrjen e Ministrit të Punëve të Jashtme Ditmir Bushati dhe Ministres së Mbrojtjes Mimi Kodheli.
Zyra e shtypit të Kryeministrisë ka shpërndare disa foto nga nisja e samitit, ku bie në sy shtrëngimi i duarve mes kryeministrit Rama dhe kreut të Shtëpisë së Bardhë, Barack Obama.
Në rrafshin politik, ky Samit konsiderohet me rëndësi të veçantë për Aleancën, pasi zhvillohet në një moment kritik të përballjes me sfida serioze për sigurinë euro-atlantike, si nga Lindja, ashtu dhe nga Jugu.
Kryeministri Rama dhe delegacioni shqiptar do të jetë pjesë e diskutimeve në qendër të të cilave janë forcimi i mbrojtjes kolektive të Aleancës, projektimi i stabilitetit në hapësirën euroatlantike, kërcënimet e sfidat e sigurisë dhe angazhimi i NATO-s në Afganistan.
