Kryeministri Edi Rama ka reaguar pas ngjarjes që tronditi vendin një ditë më parë, vdekja e të riut Lear Kurti në komisariatin numër 3 në Tiranës pas shoqërimit nga policia. Nga Elbasani, në një takim me elektoral, Rama mori në mbrojtje Policinë pas deklaratave të opozitës se akuzojnë uniformat blu për vrasjen e të riut, pasi sipas tij gjëja nuk është bërë me të keq dhe se duhet pritur raporti i autopsisë.
Gjithashtu kryeministri sulmoi opozitën për retorikën e përdorur për ngjarjen e rëndë duke thënë se duan ta lidhin me rastin e Klodian Rashës për të nxjerrë njerëzit në shesh.
“Kanë që dje që akuzojnë Policinë se ka vrarë një djalë të ri. Ndërkohë që në mënyrën më korrekte, serioze, dinjitoze, ka pezulluar personat që të mos jenë të përfshirë në asnjë lloj procesi…Është mjekësia ligjore që bën punën e vet. Nuk ka asnjë arsye që të ketë pasur arsye nga jashtë, të ketë qenë gjë e bërë me të keq. Të gjithë presim autopsinë, raportin mjeko-ligjor e me radhë. Çfarë qeniesh janë këta që u dalin njerëzve si gogolë në ekrane…E vrau Policia sepse duan ta lidhin në psikologjinë e njerëzve me atë tmerrin e madh që ishte, të të ndjerit Klodian Rasha dhe duan të nxjerrin njerëzit rrugëve,” tha kryeministri Rama nga Elbasani.
