Kryeministri refuzon çdo përpjekje të Metës e Bashës për qeveri teknike, qeveri besimi ose shtyrje të zgjedhjeve të 18 qershorit. Reagimi i parë pas propozimit të aleatit të tij Ilir Meta për qeverinë e besimit si zgjidhje e krizës
Asnjë tërheqje nga qëndrimi i tij për të vazhduar qeverisjen dhe për t’i zhvilluar zgjedhjet më 18 qershor dhe asnjë ditë më pas. Ky është qëndrimi i kryeminsitrit Rama, në përgjigjen e tij drejtuar aleatit në qeverisje, Ilir Meta, kryetar i LSI-së. Kryeministri ka refuzuar çdo propozim që ka lidhje me qeveri teknike apo siç e ka quajtur Ilir Meta propozimin e tij, vendi ka nevojë për një qeveri besimi. Rama duket i vendosur të shkojë në zgjedhjet e 18 qershorit, me qeverinë që drejton i bindur se kushtetuta ia dikton këtë e po ashtu edhe zhvillimin e zgjedhjeve më 18 qershor.
Deklarata
E vlerësoj përpjekjen e bashkëkryetarit të koalicionit qeverisës, Ilir Meta, për të kërkuar një zgjidhje që kënaq Partinë Demokratike.
Edhe unë kam qënë dhe mbetem i gatshëm per cdo zgjidhje që i’a lehtëson Partisë Demokratike rrugën për t’u kthyer në Kuvend; votuar Vetingun; vazhduar betejën e vet politike në shinat e Kushtetutës e të ligjshmërisë dhe garantuar bashkë me ne, që zgjedhjet e 18 qershorit të jenë më të lirat e më të ndershmet të zhvilluara ndonjëherë në Shqipëri.
Qeveria jonë është angazhuar në një rrugë reformash tërësore. Kemi vendosur një bazë ligjshmërie për të bërë shtet, në vend të rrëmujes së paligjshmërisë pa shtet. Kemi rikthyer rritjen e qendrueshme ekonomike, në vend të batakut të një ekonomie të zhytur në borxhe paralizuese e korrupsion mbytës. Dhe as do te kthehemi mbrapa, as do të ndalemi në rrugën që na ka përcaktuar mandati i popullit, pse një pakicë ka frikë nga Vetingu dhe nga gjykimi i popullit në zgjedhje!
Nëse Partia Demokratike kërkon një diskutim serioz me ne, jam i gatshëm të ulemi për të diskutuar, që sot, edhe në çadër po të jetë nevoja. Dialogu ka qenë e mbetet gjithnjë zgjedhja ime e parë dhe unë kam qenë e jam i hapur për cdo kërkesë apo zgjidhje, që nuk cënon Kushtetutën e nuk i bie ndesh standarteve demokratike.
Kushtetuta jonë është shumë e qartë – zgjedhjet duhet të mbahen në 18 qershor.
Kushtetuta është shumë e qartë – qeveria është vullnet i shumicës.
Nëse biem të gjithë dakord me Kushtetutën, unë jam i bindur se mund të biem dakord për gjithcka tjetër.
