Me anë të një kërkese drejtuar Kuvendit të Shqipërisë, kryeministri Edi Rama ka bërë thirrje për mbledhjen e një seance të jashtëzakonshme.
Kërkesa ka përcaktuar që seanca plenare të mblidhet pasditen e së hënës (22 maj 2017) në orën 18.00.
Në seancën plenare pritet të votohen komisionet e vettingut, ndryshimet në qeveri me ministrat teknik, ndryshimet në kodin zgjedhor si dhe zgjedhja e kryetarit dhe një anëtari të ri në KQZ.
Njoftimi i Kuvendit
Bazuar në nenin 74 të Kushtetutës dhe në nenin 42 të Rregullores së Kuvendit, Kryeministri i Republikës së Shqipërisë z. Edi Rama, i ka drejtuar Kuvendit një kërkesë të motivuar me shkrim për thirrjen e Kuvendit në sesion të jashtëzakonshëm.
Kërkesa ka përcaktuar që thirrja e Kuvendit në sesion të jashtëzakonshëm të zhvillohet ditën e hënë, më datë 22 maj 2017, në orën 18.00.
Rendi i ditës i seancës plenare do të përmbajë diskutimin dhe votimin e çështjeve për vënien në zbatim të Marrëveshjes Politike të datës 18 maj 2017, lidhur me:
-Votimin e dekreteve të Presidentit të Republikës për lirim dhe emërim të zëvendëskryeministrit dhe të 6 ministrave;
-Shqyrtimin dhe miratimin e paketës ligjore që ka lidhje me reformën zgjedhore;
-Miratimin e anëtarëve të pakicës parlamentare në 3 komisionet ad hoc të vettingut, si dhe caktimin e zëvendësuesve;
-Zgjedhjen e Kryetarit dhe një anëtari të KQZ-së.
Në përputhje me Rregulloren e Kuvendit dhe afatet e parashikuara në të, Kryetari i Kuvendit do të nxjerrë urdhrin për mbledhjen e Kuvendit në sesion të jashtëzakonshëm dhe do të publikojë rendin e ditës.
