“Nga skemat e ndihmës përfitojnë ata që pajisen me NIPT”
Kryeministri Edi Rama ja ka kushtuar paraditen e të shtunës takimeve me fermerët në Urën Vajgurore e Berat. Në pikën e grumbullimit Hatija në Urën Vajgurore, Rama tha se programet e ndihmës financiare të qeverisë, kanë zhvilluar prodhimin bujqësor dhe rritur eksportet e punësimin. “Në janar kemi patur një rritje të eksportit. Nga 1.1 miliardë lekë janarin e kaluar, në 1.5 miliardë lekë këtë janar. Ka një rritje të eksportit dhe ka një rënie të importit të disa prodhimeve bujqësore, që kanë patur një zhvillim më të konsiderueshëm, falë mbështetjes që kemi dhënë. Kemi hapur një cikël komplet të ri për bujqësinë me mbështetjen e qeverisë shqiptare që ka ngritur një Fond garancie dhe me bankat e nivelit të dytë, që falë bashkëpunimit tonë me Bankën Europiane për Rindërtim dhe Zhvillim janë të gatshme të japin kredi me interesa shumë të favorshme për bujqësinë. Kjo e kombinuar me programin e financimit të ujitjes dhe kullimit, programi më i madh që ka financuar një qeveri shqiptare në këto 25 vjet për të siguruar që pastrohen të gjitha kanalet dhe të sigurohet ujitja dhe kullimi, ne kemi besim se do të na japë një hop cilësor dhe sasior”, ka thënë Kryeministri Rama.
Kryeministri tha se fermerët për të përfituar sa më shumë nga skemat e ndihmës, duhet të pajisen me NIPT. “Ne kemi bërë një sakrificë buxhetore, në kuptimin e përgjithshëm të buxhetit, duke vazhduar të rimbursojmë 20% të prodhimit, në mënyrë që të nxisim formalizimin dhe qoftë për ju, qoftë për të gjithë ata që prodhojnë në fushë, është shumë e rëndësishme që të jenë të formalizuar, në mënyrë që të përfitojnë 20% e rimbursimit. Ata që kanë marrë NIPTI-n përfitojnë shumë më tepër se më parë.”
Më pas Rama ka inspektuar Digën e Duhanasit në Berat, ku ka folur për investimet e qeverisë në ujitjen e kullimin e tokave bujqësore.
