Kryeministri Edi Rama deklaroi se për të shmangur masat e forta shtrënguese atëherë duhet të zbatohen masat aktuale.
Në një konferencë online me fokus situatën e pandemisë Covid, Rama tha se së shpejti do të ketë rritje gjobash, pasi i ka konsideruar veprime të papërgjegjshme dhe të pajustifikueshme grumbullimet me më shumë se 10 persona siç edhe vendosi Komiteti i Ekspertëve Teknik.
“Masat që janë dhe ato funksionojnë, por duhet të zbatohen siç duhet që të funksionojnë siç duhet. Qasja e autoriteteve ka qenë një qasje më shumë sensibilizuese dhe mirëkuptuese se sa represive, por mesa duket konstatohet prej autoriteteve të shëndetësisë dhe vihet re se në javët e fundit kemi një rënie të angazhimit të qytetareve që nga vendosja e maskave. Theksoj për politikanët dhe e bëj të qartë se nuk kam vetëm ata që i përkasin partive të tjera, por edhe ata që janë pjesë e partisë që drejtoj që shkelin rregullat duke u mbledhur me shumë persona sa janë përcaktuar nga Komiteti Teknik. Kjo është e papërgjegjshëm dhe e pajustifikueshme sepse të gjitha bashkë bëjnë atë që nuk duket si një front i bashkuar në luftën kundër Covid. Ne jemi të shqetësuar sepse nëse nuk reagojmë me përgjegjshmëri tani dhe nëse nuk bën detyrën tani situata rrezikon të përkeqësohet, numri i infektimeve rrezikon të rritet dhe patjetër barra e sistemit shëndetësor rrezikon të rëndohet në kushte kur kjo është e shmangshme. Jemi të qartë që masat propozohen nga Komiteti Teknik. Ne kemi detyrimin të bëjmë më shumë se sa të tjerët që zbatimi i masave të jetë sa më korrekt. Pfizer do të fillojë lëvrimin e sasive të tjera duke nisur nga mesi i shkurtit, vaksinat do të shtohen, por koha kur vaksinat dhe masa e numrit të vaksinuarve të këpusë zinxhirin është ende larg”, tha Rama.
