Edi Rama i është rikthyer bisedave të tij mbrëmësore me shkrimtarin dhe shqipëruesin, Ardian Klosi.
Në sallën COD të qeverisë Oliver Schmit paraqiti librin “Për Ardian Klosin, gjermanin nga Shqipëria”.
Pikërisht, në këtë mbrëmje kryeministri zbriti nga froni i tij politik për të mbajtur një ligjëratë sa njerëzore, miqësore dhe thellësisht letrare.
Ai nuk u fsheh pas gishtit, por rrëfeu se miku i tij Ardian Klosi ishte një shpirt i trazuar, i cili pati një raport të komplikuar me vdekjen. Dukej sikur në fakt, Edi Rama i fliste një pasqyre. Dukej sikur fliste për Ardian Klosin, por edhe për veten.
“Arsyeja pse përkthente ishte nevoja për higjienë. Nëse nuk do kishte atë trazim të madh që i vinte së brendshmi, por që agravohej nga injoranca dhe pisllëku nuk do kishte përkthyer.
Për shkak të nevojës për të bashkëjetuar, pra përkthimi ishte mundësi për të bashkëjetuar në një shoqëri me të tjerë që i zgjidhte vetë, komunikonte me ta, ishte një lloj rruge në arrati, ashtu sikurse ishte një lloj flirti me të vdekurit.
Vdekja ishte një fuqi që tek Ardiani vepronte në mënyrë të pavetëdijshme. E kishte me vete, nuk e shmangte atë. Një flirt me të vdekurit që i zgjidhte vetë trazimi i tij rritej. Mendja e mprehtë që kishte ia rëndonte trazimin.
I përkiste një lloj shkolle që nuk e pranonte intelektualin si koncept jashtë angazhimit. Për Ardianin intelektuali ishte ai që rron me të vërtetën.”
Kur rrëfen bisedat me mikun e larguar në botën e përtejshme Rama thotë:
“Gjithmonë ia thosha që do përfundosh duke vrarë veten dhe pasonte e qeshura…
Kur ndërtonte shtëpinë tek liqeni, thoshte do bëj papafingo lart.
Kur shkoja ta takoja ndonjë natë, i thosha, pak a shumë në këtë orë këtu lart do ndjehet një krismë e thatë …I madhi Ardian Klosi nuk na tha lamtumirë por na tha: Ik pirdhuni!”
Me këtë fjalë, për pak minuta u rikthye në qytet Edi Rama i letrave, ai që burgoset përdhunshëm prej zejes së politikës, e cila e ka zënë mikun e Danit prej gryke. Por, ky i fundit, ia doli t’ia falë lirinë, qoftë edhe për pak artistit që ndrydh dhunshëm kryetari i qeverisë.
* Ky shkrim është botuar më 23 prill, 2016
