Ambasada e Shqipërisë në Greqi, ka reaguar pas denoncimeve se sot nuk ishin hapur dhe qytetarët kanë pritur për orë të tëra për të aplikuar për pasaportë.
Në një reagim në rrjetet sociale, ambasada njofton se zyrat konsullore kanë qenë në punë me orare të zgjatura dhe kanë bërë 350 aplikime vetëm sot.
“Të nderuar qytetarë, Ora 19:23 dhe Ambasada vijon të ofrojë shërbime konsullore pranë zyrës konsullore, duke ofruar rreth 350 aplikime deri më tani, kryesisht aplikime për pajisje me Pasaportë dhe Kartë ID. Lutemi të keni parasysh që Ambasada do të fillojë të ofrojë shërbime pa ndërprerje nga ora 08:00 deri në orën 20:00. Kërkojmë mirëkuptimin e qyteterëve që, nga e hëna dt. 03.08.2020, të respektojnë oraret e caktuara për takim, për të evituar radhë të gjata dhe garantuar shpejtësi dhe cilësi në shërbim”, shkruhet në reagim.
