Një tjetër masë është marrë nga Policia e Shtetit për të pasur nën kontroll drejtuesit e mjeteve.
Policia ka vendosur në disa akse rrugore të vendit radarë të fshehtë që bëjnë fotografimin e makinave duke matur shpejtësinë e lëvizjes.
Radarët që mund të bëjnë deri në 700 shkrepje në ditë janë vendosur në Fushë-Krujë-Laç, Tiranë-Durrës dhe Lushnjë-Fier.
Këta radarë do të kontrollohen çdo ditë nga oficerë të Policisë Rrugore dhe më pas do të bëhet kontrolli i fotografive për të zbuluar se cilat makina ecin shpejtësi dhe shkelin kodin rrugor.
Shkak i vendosjes së këtyre radarëve janë aksidentet e shpeshta që ndodhin në disa prej akseve kryesore në vend.
Policia thotë se do të njoftojë shoferët me tabelë, për çdo aks që do të monitorohet me radarë të fshehtë, por pa specifikuar vendet ku do të vendosen. Gjoba shoferëve do t’ju dërgohet me postë.
