Rritja në mënyrë të frikshme e çmimeve në javët e fundit ka futur vendin një kaos të vërtet ekonomik. Për këtë arsye qeveria është detyruar të rishikojë buxhetin e këtij viti dhe shpenzimet më të larta t’i përqendrojë në zëra që deri më sot nuk ishin parashikuar.
Nëpërmjet një akti normativ qeveria ka vendosur të rrisë me 10 miliardë lekë të ardhurat dhe shpenzimet, ndërkohë që ka mbetur i pandryshuar deficiti buxhetor. Në ndryshimin e buxhetit është saktësuar në nenin 11 se fondi për paketën e rezistencës sociale ndaj pasojave të krizës është 6 miliardë lekë. Ky fond parashikon përballimin e çmimeve të rritura të karburantit, rritjen e pagës minimale si dhe indeksimin e pensioneve.
Qeveria ka vendosur që fondin për indeksimin e pensioneve ta rrisë, nga 2.5 miliardë lekë që ishte parashikuar në 3.3 miliardë lekë. Në aktin normativ është përcaktuar edhe fondi prej 20 miliardë lekësh që do të përdoret për faturën e rritur të energjisë elektrike, duke e çuar në total buxhetin që do të përdoret për krizën energjetike në 28 miliardë lekë, pasi 8 miliardë lekë ishin parashikuar që në buxhetin fillestar.
Nëpërmjet këtij rishikimi, qeveria parashikon rritjen e të ardhurave tatimore me 10 miliardë lekë për këtë vit. Nga 360,5 miliardë lekë që ishte parashikimi në ligjin e buxhetit, tanimë parashikimi ka shkuar në 370.5 miliardë lekë. Burimi kryesor ku mund të merren të ardhurat janë TVSH dhe akciza, duke reflektuar edhe çmimet e rritura që kanë impakt pozitiv në rritjen e të ardhurave nga këto dy taksa. Të ardhurat nga TVSH-ja parashikohet të rriten me 7 miliardë lekë ndërsa nga akciza me 2 miliardë lekë. Rritje është parashikuar edhe nga të ardhurat e biznesit e konkretisht të tatimit mbi fitimin. Nga ana tjetër fondi rezervë është ulur nga 2.9 miliardë lekë në 2 650 milionë lekë, po ashtu është reduktuar edhe fondi për “Emergjencat civile”, nga 810 milionë lekë që ishte në 600 milionë lekë.
