Rënia e shpenzimeve, suficiti buxhetor 16.5 miliard lekë
Edhe pse paratë “në arkë” nuk i mungojnë qeveria vijon të jetë e shtrënguar me shpenzimet, e në mënyrë të veçantë me investimet buxhetore. Sipas të dhënave fiskale paraprake të katërmujorit të parë buxheti e ka thelluar suficitin në 16.5 miliardë lekë. Qeveria po shpenzon më pak dhe kjo përveçse i shërben uljes së borxhit, në krahun tjetër nënkupton një rënie të kontributit të shpenzimeve publike në ekonomi. Sipas Ministrisë së Financave, për katërmujorin qeveria shpenzoi rreth 10.5 miliardë lekë ose 8.4 për qind më pak krahasuar me të njëjtën periudhë të një viti më parë. Ulja e shpenzimeve ka ardhur nga mbyllja e detyrimeve të prapambetura, e në mënyrë të vecantë nga rënia e investimeve publike, që në katër muaj ishin vetëm 10.5 miliardë lekë, ose 26 për qind më pak se në të njëjtën periudhë të 2015. Ndërkohë në krahun e të ardhurave konfirmohet rritje me afro 131 miliardë lekë, ose 7.4 për qind më shumë se në të njëjtën periudhë të 2015-ës.
