Qeveria ka reaguar ndaj akuzave të opozitës lidhur me procesin e përzgjedhjes së gjyqtarit që do të përfaqësojë Shqipërinë në Strasburg. Përmes një deklarate për mediat, Këshilli i Ministrave sqaron se për shkak të përfundimit të afatit bëhet i pamundur procesi i vettingut për kandidatët që do të jenë në garë për zëvëndësimi ne Ledi Biankut në GJEDNJ, për shkak të mbarimit të mandatit të këtij gjyqtari më datë 31.1.2017. Në deklaratë sqarohet se është ngritur një komision Ad hoc i përbërë nga anëtarë të institucioneve të pavarura dhe nga bota akadamike, të cilët po kryejnë procesin brenda të gjtiha normave. Qeveria sqaron se kandidatët do të kalojnë në të gjitha procedurat e kontrollit të tyre ndërkohë që theksohet se do të jenë tri kandidatura ndër të cilat do të përzgjedh fituesin Asambleja e KE-së.
Për sa i përket procesit të vetting-ut ku opozita shprehu shqetësimin, qeveria thekson se komisioni gjatë kryerjes së “procedurave përzgjedhëse për kandidatët për pozicionin e gjyqtarit të Shqipërisë në GJEDNJ, po zbaton dhe po vlerëson kandidaturat në përputhje jo vetëm me kriteret e thirrjes për aplikim, por edhe me parimet që qëndrojnë në themel të procesit të vetting-ut, të cilat lidhen me çështje të kompetencave profesionale, verifikimin e deklarimit të pasurisë dhe integritetin”.
“Për sa më lart dhe të vendosur për të garantuar profilin e kandidatëve për gjyqtarë, në përputhje me standardet më të larta, jo vetëm profesionale, por edhe morale, Komisioni, i ka kërkuar aplikantëve vërtetimin e dorëzimit të formularit të vetëdeklarimit për garantimin e integritetit të personave që zgjidhen, emërohen ose ushtrojnë funksione publike ose plotësimin e tij, si dhe ka kërkuar në rrugë zyrtare pranë ILDKPKI-së informacion mbi verifikimin e deklarimit të pasurisë në përputhje me legjislacionin në fuqi”, thuhet në reagim. Emrat e aplikantëve të cilët po shqyrtohen prej Komisionit janë: Xhezair Zaganjori, Altina Xhoxhaj, Dariel Sina, Elira Kokona, Ina Rama, Sokol Berberi, Gent Ibrahimi, Plarent Ndreca, Ledia Mirakaj, Sokol Puto, Ornela Rrumbullaku
