“Qençe nuk jetohet”. Kjo është një nga parrullat që kanë zgjedhur studentët për të treguar indinjatën ndaj kushteve të konvikteve në Qytetin Studenti. Në dritaret e konvikteve ku kalojnë pjesën më të madhe të jetë studentore, gjatë ditës së djeshme ata kanë shpalosur parrullat me kërkesën që kushtet të ndryshojnë.
Lëvizja për Universitetin shkruan:
Ditën e sotme, studentë që banojnë në Qytetin Studenti, të mbështetur nga aktivistë të Lëvizjes Për Universitetin, përmes disa parullave të nxjerra në dritaret e konvikteve, protestuan për kushtet skandaloze në këto të fundit.
“Qënçe nuk jetohet më!”, “Duam kushte!” dhe “Ku shkojnë paratë tona?!” ishin disa prej parullave të shpalosura prej studentëve.
Kushtet në konvikte lënë shumë për të dëshiruar. Me dhoma të vogla në të cilat janë të detyruar të rrinë të paktën 3-4 studentë, me tualete kolektive në të cilat mund të ngelesh pa ujë në dush edhe pas disa orësh në radhë, me krevatë të cilëve iu kanë dalë telat nga të gjitha anët, me kushte higjienike si mos më keq, me pagesë mujore goxha të kripur në raport me kushtet: nuk dihet kur ka qenë hera e fundit që janë bërë investime për të siguruar kushtet minimale!
Autoritetet përgjegjëse duhet të ndërhyjnë sa më shpejt që kjo situatë të ndryshojë njëherë e mirë!
Qënçe nuk jetohet më!
