Liberalizimi i vizave për Kosovën është shndërruar tashmë në një odise. Prej vitesh e vitesh, politikanët kosovarë u kanë premtuar qytetarëve të tyre se liberalizmi i vizave ishte vetëm çështje ditësh. E ditët iknin, javët iknin, muajt iknin, vitet iknin e liberalizimi nuk është askund. Pavarësisht kësaj, sidomos në çdo fushatë zgjedhore, premtimi i liberalizimit bëhej tema më e nxehtë dhe më joshëse.
Sidoqoftë, sot, Parlamenti Europian në një votim pro vizave e ka çuar edhe një hap drejt finalizimit këtë proces. Përveç gëzimit, lajmi megjithatë ka shkaktuar edhe mosbesim dhe një valë humori në rrjetet sociale, pasi pas secili votim në institucionet përkatëse të BE’së po përcillet me festë e urime.
As votuesit e tyre nuk po u besojnë më politikanëve për heqjen e vizave. Kjo pasi rekomandimet pozitive për liberalizim politikanët i shndërronin në festë dhe e konsideronin si punë të kryer. Janë bërë 3 vjet që nga koha kur ish-ministri i Integrimeve, Bekim Çollaku festonte me shampanjë për liberalizimin e vizave përkundër faktit që atë kohë Kosova ishte shumë larg heqjes së tyre.
Festimet e tilla kanë bërë qytetarët që të shprehin dyshime edhe pse sot Parlamenti Europian votoi “pro” për liberalizimin e vizave për Kosovën.
Shakatë kanë shpërthyer në Facebook. Shumë qytetarë kanë shkruar se edhe pse Kosovës u janë liberalizuar vizat për të 100-ën herë Kosova vazhdon të jetë më e izoluari në botë.
