Lidhur me projektin e Pyllit Orbital, Bashkia e Tiranës dhe Agjencia e Parqeve dhe Rekreacionit, me kontributin e Qendrës Sociale “Të qëndrojmë së bashku”, ka vijuar me mbjelljen e 100 pemëve të tjera në Farkë.
Kryetari i Bashkisë së Tiranës, Erion Veliaj theksoi se kjo është mënyra më e mirë për t’i lënë gjeneratës së ardhshme një qytet më të mirë dhe më të shëndetshëm.
Veliaj nënvizoi se falë vëmendjes së kushtuar në këto dy vite në këtë zonë, Parku i Liqenit të Farkës po merr formë të plotë, ku veç mundësive për aktivitete sportive, po krijohet edhe një hapësirë e tërë me pemë dhe bimësi të tjera.
Kryebashkiaku i ka bërë thirrje edhe një herë të gjithë bizneseve, por edhe atyre individëve që kanë një rast gëzimi që duan ta fiksojnë në memorie, ta bëjnë këtë nëpërmjet dhurimit të një peme për pasurimin e parqeve dhe hapësirave të tjera në qytetet, siç janë lulishtet apo rrugët.
