Kremlini ka pohuar se presidenti rus Vladimir Putin është në gjendje të mirë shëndetësore, duke hedhur poshtë ato që i quajti raporte të rreme se presidenti rus është sëmurë.
“Gjithçka është në rregull,” tha zëdhënësi i Kremlinit Dmitry Peskov në konferencën e tij të përditshme.
“Ju e dini që specialistët ukrainas të informacionit, dhe ata amerikanë dhe britanikë, kanë hedhur poshtë pretendimet e ndryshme për gjendjen e shëndetit të presidentit gjatë muajve të fundit- këto nuk janë gjë tjetër veçse falsifikime.”
Putin u kollit gjatë një daljeje publike të mërkurën, kur sipas agjencisë së lajmeve Interfax, ai ishte ftohur gjatë një vizite në Iran një ditë më parë.
“Dje ishte shumë nxehtë në Teheran, plus 38 gradë Celsius, dhe është ftohur nga ajri. Kështu që kërkoj falje”, citohet të ketë thënë Putin.
