Zaida Çobo, nëna e të miturit që u dhunua nga policia padit në Gjykatën e Tiranës, kreun e Policisë së Shtetit, Ardi Veliu.
Çobo i është drejtuar Gjykatës së Tiranës nga e cila kërkon dëmshpërblim 1 milion lekë nga Veliu për shkak të publikimit të të dhënave personale të saj.
Në padi Çobo pretendon se nga veprimet e Veliut i është cënuar nderi dhe dinjiteti. Njëkohësisht ajo i kërkon gjykatës të detyrojë të paditurin të publikojë vendimin gjyqësor në të gjitha mediat e vendit.
“Detyrimin e palës së paditur për të shpërblyer dëmin jo pasuror të shkaktuar paditëses nga cenimi i nderit dhe dinjitetit dhe publikimit të të dhënave personale në masën 1 milion lek. Detyrimin e palës së paditur të publikojë vendimin e gjykatës në të gjithë mediat në Republikën e Shqipërisë”, thuhet në objektin e padisë ngritur ndaj Veliut.
