“Mjaft më, mos u bëni bajat! Librat mungojnë nuk janë të gjithë… madje mungojnë shumica se nuk është bërë tenderi i pullave”
Nxënësit e shkollave, duke nisur nga klasa e parë e deri tek e nënta, nuk do t’i kenë në dorë librat e tyre me nisjen e vitit të ri shkollor. Zyrtarët e lartë të Ministrisë së Arsimit kanë mashtruar me deklarata sipas të cilave librat janë gati. Por JO, nuk është e vërtetë! Prindërit janë përballur me një situatë krejt tjetër në libraritë apo shkollat ku shpërndahen librat. Mungojnë shumica e teksteve dhe arsyetimi banal si gjithmonë është ai i mungesës së organizimit të tenderave.
Kësaj here librat i vonon një tender që do të zhvillohet më 5 shtator. Ka mjaft prindër që kanë denocnuar përmes facebook, këtë mashtrim të ministres Nikolla dhe zyrtarëve të saj. Gazetarja Manjola Zeka, ka treguar përvojën e saj sot, kur kishte shkuar të blinte librat për dy fëmijët.
Denoncimi:
“Mjaft më, mos u bëni bajat! Mjaft më, mos nxitoni të dilni me deklarata për t’u dukur të mirët e dynjasë! Mjaft më, mos i sorollasni më prindërit dhe fëmijët, duke i dërguar në librari. Libra nuk ka. Ose me saktë nuk janë të gjithë. Dhe e dini pse? Sepse tenderi i pullave në Ministrinë e Arsimit përfundon më datë 5 Shtator. Kjo është përgjigja, që unë mora sot, kur shkova për të blerë librat e fëmijëve. Për klasën e 9-të, mungonin fizika, informatika, Anglisht-Frëngjisht, e ndërsa për klasën e 6-të, mungonin pothuajse të gjithë. Nuk mora gjë…. Mungesa kishte në të gjitha klasat, duke filluar nga vogëlushët e Abetares. Nuk është hera e parë, ky avaz është gjithmonë, çdo fillim viti. Pa dashur të gjykoj njeri, pse u dashka lënë ky tender pikërisht për tani?! Pse duhet që një fëmijë në klasë të parë, t’i mbushen sytë me lot, kur nxiton për të marrë librat dhe ktheht pas, se nuk janë të gjithë? Pse duhet që të shtyhemi në radhë, ditët e fundit se mos ngelim pa libra.. deri kur do vazhdojë kështu?!
Nuk kisha ndërmend të shkruaja asnjë radhë. Po lexoja titrat nëpër TV, ku thuhej, nxitoni se librat janë pranë librarive afër shkollave. Pse nuk i bëni një herë punët taman, por gjysma-gjysma? Pse gënjeni???”
Kështu shkruan Manjola Zeka, e cila është mbështetur nga dhjetra prindërve, ku përfshihen shumë gazetarë që e denoncojnë mungesën e librave dhe mashtrimin e Ministrisë së Arsimit.
