Deputeti i Partisë Demokratike Gazment Bardhi ka reaguar në lidhje me vendimin e konferencës së kryetarëve, për të rrëzuar kërkesën e opozitës për ngritjen e një komisioni të posaçëm parlamentar në lidhje me ligjin për investimet strategjike.
Sipas Bardhit, kryeministri po përpiqet të fshehë aferat korruptive të ministres Xhaçka, ndërsa tha se PD do të depozitojë kërkesë për ngritjen e një komisioni hetimor për këtë çështje.
“Edi Rama rrëzoi sot kërkesën e PD për komision të posaçëm për verifikimin e procedurave për investimet strategjike, duke pranuar defacto se pasurinë publike e ka kthyer në plaçkë për miqtë dhe familjarët e tij. Përpjekja për ti fshehur publikut aferat korruptive me ligjin e investimeve strategjike, ku ndër përfituesit është edhe familja e ministres Olta Xhaçka, do të dështojnë. Shqiptarët do të shohin sesi pronat publike po ndahen tek familjarët e ministrave, tek miqtë e Edi Ramës dhe tek një grusht oligarkësh pranë tij. Nesër PD do të depozitojë kërkesë për ngritjen e një komisioni hetimor për këtë çështje, duke i hequr çdo mundësi Edi Ramës për të bllokuar transparencën dhe llogaridhënien me votat e nongratave të tij në Kuvend”, tha Bardhi.
