Në protestën e zhvendosur tani para Ambasadës Amerikane, protestuesit e 4 zonave në Tiranë i kanë bërë thirrje Edi Ramës që të marrë sa më parë masa, në të kundërt do të jetë shumë vonë. Ata kanë paralajmëruar kështu se protestat do të ashpërsohen dhe ata do të vendosin vetëgjyqësi.
Njëzëri ata thonë se po i nxjerrin nga shtëpitë e tyre që të ndërtojnë kulla, ndërsa theksojnë se nuk janë dakordësuar me kontratën e propozuar nga bashkia, pasi sipas tyre është e njëanshme, dhe nuk merr parasysh kërkesat e tyre. Ato thonë se janë të ligjshëm dhe nuk do të ndalin protestën e tyre, pasi po kërkojnë një të drejtë legjitime.
“Merr masa sepse do të jetë vonë kur të kujtohesh ti. Ne do t’i vazhdojmë protestat. Duhet përgjigje se ku dhe kur do të strehohemi dhe ku do ti marrim ndërtesat tona. Nuk nxirren banorët në rrugë, për të ndërtuar kulla. Shteti shqiptar na dhunon çdo ditë dhe na thonë jemi të paligjshëm. Ne jemi të ligjshëm. Ne kërkojmë vetëm të drejtën tonë. Ku janë ato që përfaqësojnë zotin në tokë, e ndërsa bëjnë paradë në rrugët e Parisit këtu nuk ju dëgjohet zëri. Heshtja është turp, është të shtrihesh përballë pushtetit. Ne nuk do të heshtim. Qëndresa jonë do të jetë liri. Ku po i çoni këta banorë Edi Rama, ne i kemi shtëpitë tona, por ju doni të ngrini pallat jo për në, por për oligarkët”, u shprehën disa banorë.
Çdo të enjte banorët e zonës së ‘5 Majit’, Laprakës, Paskuqanit dhe të Kodrës së Priftit, mblidhen në protestë kundër shembjeve të banesave të tyre, shtëpitë e të cilëve preken nga projekti i Unazës së Madhe si dhe rikualifikimit urban.
