Banorët e pallatit numër 7 në qytetin bregdetar të Durrësit kanë dalë sërish në protestë ditën e sotme për dëmtimin që po u bëhet nga punimet që po kryhen në pallatin tjetër.
Për Faxnews ata shprehen se punimet që po bëhen në pallatin tjetër, po i dëmtojnë. Banorët kërkojnë që të ndalohen punimet pasi tregojnë se dy kollona janë tërësisht të dëmtuara dhe rrezikojnë të shemben komplet duke i zënë edhe ata brenda.
DEKLARATAT E BANORËVE:
-“Kryetarja këtu duhet të vijë sepse është një protestë nga banorët e pallatit pasi aty po gërmohet ndërkohë që janë 2 kollona të prishura. Ne duam të ndalohen menjëherë punimet, sepse këtu rrjedh edhe burim ujor, nëse vërtetohet si i tillë, e padiskutueshme që ndalohet leja.”
-“Ne komunikuam dje me kryeprokuroren e Durrësit Anita Jolla, kjo na çoi te shefi komisariatit, më pas ky na çoi tek komisariati i plazhit. Ky i fundit na tha bëni dy fotografi, ne kemi si detyrë të vijmë të shohim aty dhe kaq.”
-“Ka qenë gjyqi për ditën e hënë dhe unë mendoj se është shtyrë me kastile që të hapet kjo gropë. Sepse ai gjyqtarja që ka gjyqin, Shpëtime Pitaku akuzohet për 1 milion euro pasuri të fshehura. Në rregull? Dhe këta janë njerëzit që sot bëjnë ligjin nëpër institucione, po kështu do bëjë shtet Edi Rama? Me këta hajduta? Nuk bëhet kështu, sepse këta marrin lekët dhe groposin njerëz të gjallë. Ku do shkojë fëmija im që ka 2 vite që fle rrugëve.”
-“Këtu po jetonin banorë nga halli që prej tërmetit se këtu nuk rri më njeri. Edhe ata që kanë hyrje do i shesin për 10 mijë euro.”
