Vijojnë protestat e banorëve të Astirit që kërkojnë shpërblimin e banesave të tyre në masën 100% të vlerës së tregut dhe anullimin e projektit të vijimit të punimeve për ndërtimin e Unazës së Re pasi sipas tyre është një projekt korruptiv.
Protestës së banorëve të Astirit i është bashkuar edhe kryetari opozitës Lulzim Basha i cili tha ndër të tjera:
“Në këtë situatë të rëndë opozita ka kryer detyrën e saj, dhe sot iu bëj thirrje qytetarëve të Tiranës të bashkohen kundër kësaj të keqeje pasi Veliaj ka ndërmarrë edhe dy akte të tjera korruptive, njëra ka të bëjë me dhënien e pronës publike tek Policia Bashkiake dhe tjetra me dhënien me koncension të parkingjeve.
Këtij mali të arrogancës, vjedhjes, korrupsionit, fyerjes së shqiptarëve ka ardhur koha t’i japim një grusht në zemër dhe ta shembim në tokë. Këtë mund ta bëjnë vetëm qytetarët e bashkuar të cilët nuk ka forcë që ti ndalojë. Ju bëj thirrje të marrim në dorë fatin tonë me datë 16 shkurt duke u bashkuar dhe shembur sistemin korruptiv të Edi Ramës. Nuk do t’ju jepet mundësia që ti shpëtojnë drejtësisë duke ikur nga vendi, me drejtësinë e re që do të vijë Edi Rama dhe Erion Veliaj e kanë vendin tek 313-ta”.
