Kreu demokrat Sali Berisha deklaroi gjatë një konference për mediat se opozita do të vazhdojë me protestat, ndërsa paralajmëroi një organizim më të mirë të tyre.
I pyetur lidhur me praninë e deputetëve, Berisha tha se ato në tërësi kanë qenë të gjithë në protestë, por çështja se ku duhet të qëndrojnë është një çështje e diskutueshme.
“Për disa ata duhet të qëndrojnë në krye të protestës, për të tjerë kërkojnë që të qëndrojnë me grupet e qytetarëve nga zonat e tyre. Dhe kjo akoma nuk ka marrë një përgjigje. Të them unë, aty ku isha unë, nja tre metra më tutje ishte një deputet. Një bashkëqytetar i tij më shkruante ‘unë nuk e pashë kund atë njeri’, po ai ishte aty në fakt. Unë i thashë që ai ka qenë.
Por a duhet të organizohen më mirë? Plotësisht dakord. Jo vetëm me deputetët, por në tërësi PD ose organizatorët e protestës duhet të bëjnë punë më të studiuar e asaj mase të madhe njerëzish që janë aty.
Kjo është protestë paqësore. Në qoftë se ne, ndryshojmë këtë protestë nga paqësore në një formë tjetër, të garantoj se ajo masë njerëzish nuk mund të përballohet nga asnjë polici. Është e faktuar ajo. Në qoftë se ne do t’u bënim thirrje atyre, që në protesta të vini me çdo mjet, nuk ka polici që përballon dot një protestë qoftë dhe 4-5 mijë qytetarësh. Jo, është e njohur kjo. Por ne kemi qenë, jemi dhe do jemi për protestë paqësore”, tha Berisha.
