Partia Demokratike denoncon angazhimin e një numri të madh policësh në përballje me protestuesit kundër projektit të bashkisë
1800 policë janë angazhuar sot tek Parku i Liqenit për tu përballur me protestuesit. Kështu pretendon deputeti i Partisë Demokratike, Gent Strazimiri. Në një deklaratë për mediat, Strazimiri tha se është një rast i paprecedentë kur një numër kaq i madh policësh angazhohet për të mbrojtur paligjshmërinë e Bashkisë së Tiranës.
“Janë angazhuar nga 2500 forca që ka i gjithë qarku i Tiranës, ishin rreth 1800 forca, të gjithë të mbrojtje të paligjshmërisë, pjesa më e madhe të cilën ju ftoj ta dokumentoni, janë pa numër identifikimi të policëve, janë të gjithë, nga i pari deri tek i fundit me armë në brez, kjo është rreptësisht e ndaluar nga ligji, në të tilla raste.
Është qartësisht ky tender 700 milionësh që po harxhohet, është prioriteti i vetëm i policisë së shtetit dhe kësaj qeverie. Është numër rekord i policëve, në 25 vjet demokraci kjo është policia që godet opozitën, që sillet brutalisht deri refuzon të lëvizë ambulancën me njerëz që ndjeheshin keq në protestë për të shkuar në spital”, tha Strazimiri.
Strazimiri theksoi se pjesa më ndërgjegjshme e Tiranës u përball sot me paligjshmërinë e Veliajt tek parku I Liqenit. Deputeti demokrat theksoi gjtihashtu se protesta do të vazhdojë .
