Policia e Kosovës e ka arrestuar kreun e PSD-së, Dardan Molliqajn. Kjo është bërë pas përfundimit të protestës së veteranëve ku ai mori pjesë.
Për Molliqajn ishte lëshuar urdhëarrest nga Gjykata, për rastin e sulmit fizik ndaj deputetit Haki Abazi. Bashkë me Molliqajn janë arrestuar edhe disa anëtar të PSD-së.
Protesta e veteranëve të UÇK-së para Kuvendit të Kosovës për ligjin e pagës minimale është zhvilluar prej disa orësh.
Sipas mediave vendase, protestuesit që ndodhen në oborrin e Kuvendit kanë tentuar të hyjnë në ambientet e brendshme duke u përplasur kështu me policinë që ndodhet në të gjithë ambjentin rrethues të Kuvendit.
Ushtruesi i detyrës së kreut të OVL-UÇK-së, Faton Klinaku, i bëri thirrje protestuesve që të ruajnë qetësinë teksaq theksoi se nëse përshkallëzohet situata protesta do të ndërpritet.
“Ju ftoj të ruani qetësinë. Pranë nesh janë vëllezërit tonë veteranët, invalidët, familjarët e dëshmorëve. Andaj ata të cilët nuk po e ndërpresin seancën që ju kemi bërë thirrje ta ndërpresin seancën për të vazhduar me takim me përfaqësues të organizatave të dala nga lufta e duan edhe këtë provokim që ne pa arsye të ndeshemi me Policinë e Kosovës”, tha Klinaku.
Kjo është protesta e dytë e zhvilluar brenda javës në Kosovë nga veteranët e UÇK-së, të cilët kanë kërkuar pezullimin e projektligjit të pagës minimale pasi ata nuk janë përfshirë si kategori.
