Kryeministri Edi Rama deklaroi se opozita mund ta vonojë zbatimin e Vettingut, por nuk mund ta bllokojë atë.
Gjatë një interviste për emisionin “Transparencë” në televizionin lokal në Vlorë, Rama tha se vettingun e kërkojnë shqiptarët, edhe ata që ishin në bulevardin e Tiranës para ca ditës, pjesa më e madhe e tyre janë për vettingun.
“Janë në të drejtën e tyre të mos duan ta shofin me sy qeverinë tonë që të mendojnë se po erdhi në pushtet PD jeta do bëhet fushë me lule, por mbi të gjitha këtyre ata duan vetingun, pjesa më e madhe”, u shpreh Rama.
Kryeministri theksoi se një arsye se pse duhet Vettingu është projekti i Lungomares, në Vlorë i kanë dalë pronarët edhe detit dhe kjo me vendimet e gjykatave.
“Lungomare është një punë e madhe nga ana financiare, një punë e madhe nga ana teknike, ju kujtohet besoj që dikur kapërcenim kanalet e ujërave të zeza në rërë. Na është dashur të përballemi edhe me gjëra të hatashme. Unë notin e kam mësuar në atë zonë dhe unë aty kam parë det, por sot na dolën pronarë. Nëse njerëzit duan një shembull se përse duhet bërë Vettingu, është lungomarja”- tha Rama.
