Deputeti i Partisë Demokratike, Lefter Gështenja u shpreh se projektligji për urdhrin profesional të inxhinierëve nuk është konsultuar me grupet e interesit. Në një intervistë për mediat, ai tha se ky projekt ligj është nisur fillimisht me 5 shoqata dhe tani janë 11 përfaqësues të këtyre shoqatave në Kuvend.
“Për çdo projekt ligji ose amendament ligji sillet në Kuvend që do të thotë se ka një problem. Por sot në fushën e ndërtimit nuk kemi një problematikë të tillë që të bëhet një ndryshim ligjor. Është nisur fillimisht me 5 shoqata dhe tani janë 11 përfaqësues të këtyre shoqatave, të cilat e kanë nisur këtë ligj. Lë për të dëshiruar edhe mënyra se si e kanë sjellë në parlament. Ata ia kanë lënë topin një deputete si zonjës Bozo. Përmes këtij projekt ligji krijohet një institucion që do të kapë një ndër fushat më të rëndësishme, që është licencimi. Çdo person fizik dhe juridik nëse nuk regjistrohet tek ky urdhër nuk ushtron dot aktivitetin e tij, pavarësisht se sa vite ka eksperiencë. Nëse nuk ka regjistrim atëherë nuk njihet. Duhet të ishte sikurse e kanë të gjitha vendet e botës, ku është fakultative” – tha Lefter Geshtenja.
