Hartimi i kritereve dhe dokumenteve të tenderit apo kontestimet në vlerësimin e ofertave kanë detyruar 227 subjekte të ankohen pranë Komisionit të Prokurimit Publik. Të dhënat i përkasin 4-mujorit të parë të këtij vitit, ndërkohë që referuar vendimmarrjeve të KPP-së, rezulton se rreth 50% e tyre janë pranuar.
Kjo do të thotë se, ky dikaster i ka dhënë të drejtë operatorëve ekonomikë, në drejtim të vendosjes së kritereve për të marrë pjesë apo për t’u kualifikuar në një tender për punë, mallra apo shërbime, duke rrëzuar institucionet shtetërore, që shpesh herë janë kritikuar për vendosjen e kritereve selektive, me qëllim shpalljen fitues të operatorëve të paracaktuar.
Ndërkaq, nuk mungojnë as rastet kur Komisioni i Prokurimit Publik iu ka dhënë të drejtë operatorëve ekonomikë, në drejtim të vlerësimit të ofertave, duke pranuar ankesat e tyre. Kjo problematikë u evidentua edhe gjatë vitit 2021, ku sipas KPP-së institucionet shtetërore shpallën fitues në tenderë kompani me oferta ekonomike më të larta, duke rrezikuar që nga buxheti i shtetit të paguheshin miliona lekë më tepër për të njëjtën punë, mall apo shërbim.
Kjo vlerë arrinte në rreth 120 mln lekë, pa TVSH por për shkak të ankesave të operatorëve ekonomikë, pagesat nuk u ekzekutuan. Më konkretisht, gjatë vitit 2021 kompanitë depozituan 483 ankesa për fazën e vlerësimit të ofertave, që si rregull kryhet nga një komision i ngritur pranë institucionit që ka shpallur tenderin përkatës.
Numri i ankesave të kryera për fazën e vlerësimit të ofertave përbënte mbi 60% të totalit, ndërkohë që pjesa tjetër ishin ankesa për kundërshtime mbi dokumentet e tenderit. Ky trend duket se është I njëjtë edhe për periudhën janar-prill të këtij viti, duke qenë se mbi 58% e ankesave janë bërë pikërisht për të kundërshtuar vendimet e komisioneve vlerësuese./SCAN/
