Dy nga ofertat janë poshtë vlerës së kërkuar për kompaninë
Në garë për blerjen e kompanisë INSIG përfundimisht janë vetëm 4 kompani, prej të cilave njëra është e huaj dhe tre të tjerat janë kompani vendase. Madje edhe kompania e huaj që është në garë Recovered Earth Technologies, një kompani amerikane është futur së bashku me subjektin vendas Duraku SHPK. Tre të tjerët janë Balfin, e sipërmarrësit Samir Mane, Kastrati së bashku me Albsig të sipërmarrësit Shefqet Kastrati dhe kompania tjetër e sigurimeve Eurosig e sipërmarrësit Kadri Morina. Nga katër ofertat e paraqitura vetëm 2 janë më shumë se vlera e kërkuar për kompaninë INSIG. Kështu Balfin Grup ka ofruar 1,65 miliard lekë, Kastrati dhe Albsig kanë ofruar 1,5 miliard lekë,
Recovered Earth Technologies dhe Duraku shpk kanë ofruar 2,15 miliard lekë dhe Eurosig ka dorëzuar një ofertë me vlerë 2,2 miliard lekë. Vetëm dy ofertat e fundit janë më lart se vlera e caktuar prej 15.3 milion euro. Duket se këto dy kompani do të mbeten në garë për shkak se në kriteret e përcaktuara thuhet se 80 pikë do të shkojnë për çmimin më të lartë të ofruar. Sipas njoftimit të ministrisë së financave komisioni bën vlerësimin e ofertave brenda dy javësh, duke listuar kompanitë ofertuese mbi bazën e pikëve të fituara. Vlerësimi kalon për miratim në Këshillin e Ministrave ku edhe bëhet shpallja e kompanisë fituese.
OFERTAT DHE VLERAT E TYRE
Balfin shpk vlera e ofertës 1,656,000,000 lekë
Kastrati dhe Albsig (joint venture) vlera e ofertës, 1,525,473,000 lekë
Recovered Earth Technologies & Duraku shpk vlera e ofertës 2,152,800,000 lekë
Eurosig vlera e ofertës 2,222,122,000 lekë
