Primaret e kandidateve për kryebashkiakë në degët e PD Fier, Patos, Roskovec dhe Mallakastër kanë nisur që në orën 8 të mëngjesit e do të vazhdojnë deri në orën 18:00 dhe atje ku do të ketë radhë, votimi pritet të shtyhet deri në votuesin e fundit.
Materialet zgjedhore për çdo degë të PD për bashkitë Fier, Mallakastër, Patos e Roskovec kanë mbërritur që në orët e mbrëmjes se djeshme dhe u janë shpërndarë degëve përkatëse.
Burime pohojnë se probleme të vogla janë vërejtur në Roskovec e Fier ku ka pasur dublime emrash, ku konkretisht një grua e ka pasur emrin anëtare e PD, anëtare e forumit të gruas apo edhe si simpatizantë.
Deri në orët e vona është punuar për pastrimin e listave duke eliminuar dukuri të tilla në mënyrë që procesi ditën e sotme të niste normalisht.
Po ashtu edhe në Lezhë nuk ka nisur ende votimi për kandidatët e primareve të PD, për shkak të problemeve me listat e anëtarësisë. Komisioni i votimit po verifikon listat, e ndërsa pjesë janë edhe simpatizantët në pritje për të votuar pranë palestrës së gjimnazit “Hydajet Lezha”.
