Partia Socialiste ka nisur punën për përzgjedhjen e presidentit të ri, pasi Ilir Metës i skadon mandati më 24 korrik. Përmes një letre, kreu i grupit parlamentar të PS-së, Taulant Balla i ka kërkuar kryetares së Kuvendit, Lindita Nikolli që të mbledhë Konferencën e Kryetarëve.
Procedura përcakton qartë se një grup prej tre deputetësh, kreu i grupit parlamentar socialist, Taulant Balla, Sekretari i Përgjithshëm i PS, Damian Gjiknuri si dhe Ministrja e Shtetit për Marrëdhëniet me Parlamentin, Elisa Spiropali, do të jenë ata që do të bëjnë përzgjedhjen e këtyre kandidatëve të sjellë nga deputetët. Burimet pranë PS-së bëjnë me dije se grupi parlamentar i PS-së do të mblidhet të martën që vjen, ku do të bëhen edhe propozimet konkrete.
Kujtojmë që shumë emra janë përfolur për kandidaturën ku për herë të parë po përflitet kandidatura për presidenten e parë grua. Partia Socialiste i ka bërë ftesë publike Partisë Demokratike me kryetarin e komanduar Enkelejd Alibeaj për të marrë pjesë në propozimet për presidencën. Ndërkohë në kuadër të këtyre negociatave, nuk është thirrur grupi i Rithemelimit i drejtuar nga Sali Berisha nga kryeministri Rama apo zyrtarë të tjerë të PS-së për të marrë pjesë duke mos e njohur si pjesë të opozitës dhe Partisë Demokratike.
