Lammert: Në fund të muajit prill do të jem në Shqipëri
Presidenti i Bundestagut gjerman, Norbert Lammert, do të vizitojë Shqipërinë në fund të muajit prill. Këtë e ka konfirmuar vetë autoriteti i lartë i shtetit gjerman, gjatë një takimi që ka patur me një grup deputetësh shqiptarë që po marrin pjesë si delegacioni i Kuvendit të Shqipërisë në Unionin Ndërparlamentar që po zhvillohet në Lusaka të Zambias. Pjesë e delegacionit janë deputetët Luan Rama, Edi Paloka dhe Tahir Muhedini. Ata janë takuar në këtë aktivitet me kreun e Bundestagut me të cilin kanë folur për rëndësinë e bashkëpunimit midis dy parlamenteve. Në bisedën që kanë patur mes tyre Lammert ka folur për vizitën e tij të ardhshme në Shqipëri, “Në fund të muajit prill do të jem në Shqipëri dhe do të përshëndes parlamentin tuaj”, ka deklaruar Lammert.
