Ish-ministrja e jashtme Arta Dade akuzon kryeministrin Rama se po bën rolin e PR për veten e tij dhe jo të kryetarit në OSBE.
Ajo u shpreh se këto takime që Rama i kërkon, nuk janë asgjë më shumë se sa një reklamë personale e Ramës në sytë e liderëve botërorë.
Ndërkohë sa i takon ministrit të jashtëm Gent Cakaj, Dade tha se Rama mund të kishte ngelur i zhgënjyer nga përfaqësimi i tij, prandaj nuk e ka dërguar më në takime zyrtare.
Ish ministrja ka folur edhe për paketën ‘Anti-KÇK’, duke e quajtur të turpshme se si legjislacioni shqiptar mund të ketë ligje me të tillë emra.
Dade tha se është e paimagjinueshme se si mund të shkojë Rama dhe të bisedojë me Merkel apo ndonjë lider tjetër për të tilla ligje me këto emra, kur duhet të arsyetojë se çfarë e pengonte në 7 vite si kryeministër të merrte të tilla hapa.
Duke u ndalur te marrja e Presidencës së OSBE, Arta Dade theksoi se Shqipëria nuk ishte zgjedhja e parë, por u favorizua nga tërheqja e Norvegjisë dhe Republikës Çeke.
Dade ka folur edhe për takimin e Ramës me Kurtin, ku shprehet se ky është një fillim i ri për kryeministrin shqiptar, pas marrëdhënieve të tensionuara me Haradinajn, por duhet që marrëveshjet të mos mbeten vetëm në letra.
