Policia rrugore ka përforcuar masat, për personat që hedhin sende nga makina në rrugë, gjë e cila është në shkelje të qarkullimit rrugor.
Sipas policisë, hedhja e sendeve nga mjeti në lëvizje dënohet me gjobë 25.000-100.000 lekë (sipas nenit 15/1, germa f) të Kodit Rrugor.
Një rast i tillë, është konstatuar mëngjesin e kësaj të hënë në autostradën Tiranë-Durrës, në afërsi të Kasharit.
Policia ka konstatuar në këtë zonë , një qytetar nga Shkodra duke hedhur nga makina Pezho një bidon plastik.
Për këtë shkelje, drejtuesi i mjetit u ndalua dhe u gjobit me 110.000 lekë. Në fletën e gjobës, thuhet se ai lëvizte në korsinë e ndryshimit të shpejtësisë, duke u bërë pengesë dhe rrezik për përdoruesit e tjerë të rrugës.
Përveç gjobës atij iu pezullua leja e drejtimit për 6 muaj, si dhe iu zbritën 8 pikë nga patenta.
