Policët shqiptarë tashmë janë bërë ekspertë të cannabis-it. Kanë kaq vite që e ndjekin nga pas këtë bimë vrasëse prej momentit të mbjedhjes e deri në atë të trafikimit. Kanë provuar ta shohin si fidan, si bimë të rritur, ta presin me raste edhe ta asgjësojnë. Por deri tani s’kishim dëgjuar nga policia që cannabis-i ka nisur të mbijë vetë. Në një deklaratë për mediat, policia sqaron se janë gjetur 48 bimë cannabis në fshatin Mërtiraj, por ato kanë mbirë vetë.
“Gjatë kontrollit të ushtruar në fshatin Mërtiraj, pranë vendit të quajtur “Përroi i Kaminave”, u gjet një parcelë me 48 bimë narkotike të llojit cannabis, të cilat dyshohet se kanë mbirë vetë përgjatë shtratit të përroit.
Policia bëri asgjësimin e tyre me shkulje dhe djegie. Vazhdojnë hetimet për zbulimin dhe kapjen e autorëve“, theksohet në deklaratë.
Sipas kësaj deklarate autori është vetë cannabis-i që ka mbirë vetë. Kështu që policia ka kryer punë me këtë rast të kapjes dhe asgjësimit të cannabis-it bashkë me autorin.
