Në Lezhë drejtori i policisë bashkiake, Leonard Pali akuzohet nga punonjësit e një firme interneti se i ka ofenduar vazhdimisht dhe ka tentuar t’i godasë teksa kanë qënë duke punuar.
Ata deklaruan se janë përballur me dhunë fizike dhe verbale nga ana e Palit dhe një prej tyre pretendon se gjatë përplasjes, Pali i ka grisur edhe bluzën. Avokati i tyre Ndre Molla thotë se një sjellje e tillë është e papranueshme të përdoret nga ana e përfaqësuesve të shtetit.
E kontaktuar për këtë çështje, Zyra e shtypit ne Bashkinë Lezhë pretendon se kompania ka shkelur ligjin, duke kryer punime pa leje dhe nuk ka bere kërkesë për zgjatje të afatit lejes nga bashkia.
Sipas bashkisë, në rastin e fundit kompania ka kryer punime përgjatë trotuarit të Kunës në kanalin e hapur pa marrë asnjë konfirmim dhe pa asnjë të drejte për shfrytëzimin e punimeve të bëra për linjat elektrike.
