Ish kryeministri Sali Berisha ka deklaruar se kreu i qeverisë Edi Rama po terrorizon punonjësit e administratës që t’i bëjnë like dhe komente në rrjetet sociale.
Berisha tha se socialistët kanë vënë në zbatim një aplikacion që mat aktivitetin e punonjësve me like dhe komente në postimet e zyrtarëve qeveritarë.
Berisha i bëri thirrje Marc Zuckenberg dhe Elon Musk të ndalojnë këtë praktikë abuzimi në rrjetet e tyre sociale ndërsa shtoi se çështjen do ia parashtrojnë edhe ndërkombëtarëve.
“Duhet të dënojmë me forcën më të madhe terrorin digjital mbi administratën shqiptare nga Edi Rama dhe qeveria e tij. Është shpërndarë një aplikacion të cilin unë do ta quaja aplikacioni i terrorit digjital ndaj punonjësve në funksion të të cilit janë përllogaritja dhe regjistrimi i likeve dhe komenteve në postimet e qeveritarëve.
Ky është një terror digjital mbi punonjësit e administratës. Nuk ia doli me mijëra euro që ka shpenzuar duke blerë like dhe duke hapur llogari të rreme, tani kaloi në një akt të paimagjinueshëm për të fituar garën duke i detyruar punonjësit e administratës për të bërë like dhe komente dhe duke i matur ato me aplikacion.
I bën thirrje Marc Zuckenberg dhe Elon Musk të ndëshkojnë këtë praktikë të abuzimit me rrjetet e tyre sociale nga një njeri që nuk ka asnjë parim. Që terrorizon punonjësit e thjeshtë dhe të heqin këtë drejtë derisa të anulojë aplikacionin famëzi. PD do të konsiderojë në mbrojtje të qytetarëve shqiptarë dhe një proces ndërkombëtar ndaj Edi Ramës për këtë çështje. Ky është terror, turp, dengirim”, tha Berisha.
