Aleanca Veri-Atlantike (NATO), ka deklaruar se po i ndjek me seriozitet ngjarjet në veri të Kosovës.
Zëdhënësja e NATO-s, Oana Lungescu në një postim në Twitter, ka shkruar se KFOR-i po i merr të gjitha masat e nevojshme për të siguruar një mjedis të sigurt.
‘NATO i merr shumë seriozisht ngjarjet në veri të Kosovës. KFOR po merr të gjitha masat e nevojshme për të siguruar një mjedis të sigurt dhe lirinë e lëvizjes për të gjitha komunitetet në Kosovë, siç autorizohet me Rezolutën 1244 të Këshillit të Sigurimit të OKB-së’, ka shkruar Lungescu.
Ajo më tej ka shtuar se angazhimi i KFOR-it në zbatimin e mandatit të tij është i palëkundur, siç edhe tregohet nga vendosja e fundit e 500 trupave shtesë.
‘I rikujtojmë edhe një herë të gjitha palëve obligimet e tyre ndaj KFOR-it sipas Marrëveshjes Teknike Ushtarake…duke përfshirë respektimin e vijës kufitare administrative, procedurat për Policinë e Kosovës dhe Marrëveshjen e vitit 2013 për dislokimin e Forcave të Sigurisë së Kosovës në veri. Këto detyrime janë krijuar për të siguruar veprim të koordinuar, për të shmangur përshkallëzimin, dhe ruajtjen e mjedisit të sigurt’, ka shkruar Lungescu.
#NATO takes the events in northern #Kosovo very seriously. @NATO_KFOR is taking all necessary measures to ensure a safe & secure environment and freedom of movement for all communities in Kosovo, as authorised under the #UN Security Council Resolution 1244.
— Oana Lungescu (@NATOpress) June 18, 2023
