Siguria e materialeve të ndërtimit dhe standardet mbrojtëse ndaj zjarrit u kthyen në fokus të interpelancës në Kuvend mes deputetit socialist Erion Braçe dhe ministrit të Infrastrukturës dhe Energjisë, Enea Karakaçi.
Gjatë fjalës së tij, Braçe ngriti shqetësime lidhur me përdorimin e materialeve të ndërtimit dhe mungesën e kontrolleve efektive të sigurisë, duke iu referuar edhe zjarrit të ndodhur pak javë më parë në një kompleks banimi pranë QSUT-së.
Deputeti deklaroi se prona e banorëve u shkatërrua plotësisht nga flakët, ndërsa sipas tij, edhe pas disa javësh situata mbetet problematike dhe larg rikthimit në normalitet.
“Isha dy ditë më parë në kompleksin e djegur pranë QSUT-së. Përveç pagesës së qirasë për strehim të përkohshëm, nuk ka ndodhur asgjë tjetër. Nuk është bërë as pastrimi i objektit, ndërsa banorët vazhdojnë të jetojnë me pasiguri”, u shpreh Braçe.
Ai ngriti pyetje mbi ekzistencën dhe zbatimin e kodeve të mbrojtjes nga zjarri në ndërtime, veçanërisht në godinat që grumbullojnë një numër të madh qytetarësh, duke theksuar rëndësinë e certifikatave të sigurisë dhe kontrolleve periodike për sistemet elektrike, furnizimin me ujë dhe mbrojtjen ndaj zjarrit.
Sipas Braçes, sektori i ndërtimit është fokusuar më shumë te pamja estetike e objekteve sesa te standardet reale të sigurisë.
“Po ndërtojnë për të shitur një fjetinë të bukur nga jashtë, por jo domosdoshmërisht një banesë të sigurt. Siguria nuk shihet dhe për pasojë nuk shitet”, deklaroi ai.
Nga ana tjetër, ministri Enea Karakaçi tha se cilësia e materialeve të ndërtimit mbetet një nga elementët kryesorë për garantimin e sigurisë dhe qëndrueshmërisë së objekteve.
Karakaçi bëri me dije se është hartuar një projektligj i ri për tregtimin e produkteve të ndërtimit, i cili synon përafrimin me rregulloret e Bashkimit Europian dhe krijimin e një sistemi modern për verifikimin dhe certifikimin e materialeve të ndërtimit.
“Cilësia e materialeve të ndërtimit, një prej faktorëve më të rëndësishëm në garantimin e sigurisë, qëndrueshmërisë dhe funksionalitetit të objekteve të banimit. Kuadri ligjor në Shqipëri ka vendosur disa themele përsa i përket kontrollit të cilësisë në ndërtim, duke përcaktuar personat përgjegjës dhe institucionet kompetente.
Në këto akte janë detajuar dhe evidentuar dispozitat për kontrollin e cilësisë së materialeve të ndërtimit. Ligji parashikon që prodhuesi është përgjegjës për deklarimin dhe vërtetimin e konfirmimit të produktit ndërsa mbikëqyrja e tregut kryhet nga inspektorati kombëtar i mbrojtjes së territorit. Legjislacioni aktual është i hershëm dhe ka dalë nevoja për përditësim edhe në kuadër të integrimit të BE-së.
Është hartuar pr.ligji për tregtimin e produkteve të ndërtimit i cili synon përafrimin me rregulloren e BE-së të 2024-ës. Ky pr.ligj synon krijimin e një sistemi modern dhe të unifikuar për vlerësimin, verifikimin dhe deklarimin e performancës së produkteve të ndërtimit në përputhje me standardet e BE-së. Po ashtu, parashikon ngritjen e strukturave përgjegjëse për certifikimin, vlerësimin teknik dhe mbikëqyrjen e tregut me qëllim rritjen e sigurisë. Ky pr.ligj është hedhur për konsultim publik”, tha Karakaçi.
