Musaen Zeneli, është një nga 4 viktimat e masakrës së ndodhur vetëm pak pas mesnatës të së shtunës në Velipojë. Mësohet që ai punonte në kuzhinën e hotelit “Gocaj”, ku kishte ditën e tij të parë të punës, por që rezultoi të qe dita e fundit, jo vetëm në kuzhinë që e kishte pasion, por e fundit në këtë botë. Nga përplasja me armë e pronarëve të hoteleve, një plumb i marrë në zemër e shtriu në rërë për të mos u ngritur më kurrë.
Një fotot e publikuara në rrjetet sociale, ku Musaeni shihet i veshur si një shef kuzhine dhe në dorë mban një pjatë të gatuar nga vetë ai, tregon shumë për ëndrrat që kishte, por që iu prenë në mes. Mësohet se të riut në xhep iu gjetën vetëm 30 lekë, ndërsa familja e tij ishte në kushte të vështira ekonomike. I riu jetonte vetëm me nënën, për të cilën duhet të kujdesej pas humbjes së babait të tij, i cili u mbyt kohë më parë në lumin Drin. Që prej asaj kohe duhet të përkujdesej për nënën.
Djali nga Bahçallaku punonte në zonën e plazhit, në biznese të ndryshme. Së fundmi kishte folur me vëllezërit Gocaj për t’i gjetur punë. E shtuna ishte dita e parë e tij. Punën e mbylli pak pas mesnate, pa e ditur që nuk do të kthehej më në shtëpi. Musaeni la pas nënën dhe vëllain Erdisin. Familja e tij gjendet në kushte të vështira ekonomike, ndërsa nuk përballojnë dot financiarisht as shpenzimet mortore.
