Dimali ka probleme me plehrat sepse banorët e 2 fshatrave dhe një lagjeje në këtë bashki bashkëjetojnë prej disa vitesh me plehrat dhe ujërat e zeza.
Në fshatin Poshnje dhe Pashalli të cilat ndodhen shumë pranë qendrës së qytetit, kanalet e ujërave të zeza vijojnë të jenë prej vitesh të hapura, duke përhapur erën e rëndë të fekaleve në të gjithë zonën.
Por problemet nuk mbarojnë me kaq pasi kanalet janë kthyer në kosha plehrash, ku sheh të hedhura mbeturina nga llojet e ndryshme të cilat me anë të pamjeve filmike duken të hershme dhe nuk janë pastruar asnjëherë. Situata paraqitet me probleme edhe në lagjen “Guri i Bardhë” brenda qytetit, lagje e cila është harruar nga bashkia pasi prej javësh në këtë lagje nuk pastrohen koshat e plehrave.
Plehrat dhe mbetjet e hedhura në koshat e lagjes, vijojnë të jenë ende brenda dhe jashtë koshave por asnjë masë nuk është marrë për pastrimin e tyre.
Banorët e zonës janë shprehur se janë ankuar shpeshherë në bashki për situatën e keqe prej plehrave dhe ujërave të zeza, por askush nuk e ka marrë mundimin për të parë gjendjen.
“Jemi ankuar po nuk na dëgjon njeri, ku të vemi tjetër? Askush nuk do t’ja dijë, ne ankohemi kot. Siç duket u mësuam me erën e keqe të fekaleve dhe plehrave dhe nuk po na bën më përshtypje”- shprehen banorët e Dimalit.
