Eliminimi nga Botërori 2022 pa u bërë protagonist absolut siç pritej, nuk ka qenë momenti i vetëm negativ për ish-trajnerin e Brazilit, Tite. Sipas asaj që raportojnë mediat braziliane, Tite është bërë viktimë e një sulmi në rrugë teksa ecte në lagjen e tij, ndërsa edhe i kanë vjedhur sende me vlerë.
Raportohet se Tite po shëtiste në rrugë në orën 6 të mëngjesit në Rio De Zhaneiro kur është sulmuar nga person i paidentifikuar ende. Fillimisht raportohet se ai ka sharë dhe akuzuar Titen për paraqitjen e Brazilit në Botëror, ndërsa pastaj i ka hequr një varëse të artë që mbante ish-trajneri.
Përfaqësues të trajnerit kanë konfirmuar ngjarjen dhe se policia është në kërkim të personit që e sulmoi, por ndërkohë përgënjeshtrojnë se kishte një dialog rreth eliminimit të Brazilit para se hajduti t’i hiqte varësen e artë.
Tite la detyrën e tij menjëherë pas përfundimit të Botërorit, ndërsa nuk ka konfirmuar ende se ku do të vazhdojë karrierën duke filluar nga viti 2023.
