Policia ka zbardhur më shumë detaje nga ngjarja që ndodhi pak më parë në Pogradec, ku mbeti i vrarë një person. Sipas të dhënave, Joan Muçallar dyshohet të jetë plagosur në lagjen “Kalaja ” te hotel “Voloreka, me armë zjarri tip pistoletë, gjatë një konflikti të çastit, nga dy shtetas të tjerë. Madje, mendohet se kjo përplasje sot ka ardhur si pasojë e një konflikti disavjeçar mes personave me precedentë kriminalë. Ngjarja sot ka lidhje me atentatin e dy viteve me parë ku u qëllua drejt hotel Voloreka ndërkohë që ishte i mbushur me pushues.
I plagosuri i ditës së sotme është djali i pronarit të hotelit, i cili u dyshua si shënjestër e atentatit të mëparshëm. Dyshimet për ditën e sotme janë se njëri nga autorët është një nga personat e përfshirë edhe në atentatin e vitit 2020. Menjëherë në vendngjarje, kanë shkuar shërbimet e policisë dhe nga veprimet e para u bë e mundur identifikimi i dy autorëve të dyshuar konkretisht shtetasi Firdeus Berberi, Gresi Maxhari. Nga ana e Policisë janë ngritur pika kontrolli dhe po punohet për kapjen e tyre dhe sqarimin e rrethanave të ngjarjes.
