Qani Muça që qëlloi pasditen e sotme punonjësin e Inspektoratit të Mbrojtjes së Territorit, ka qenë i dehur në momentin që u konfliktua me 52- vjeçarin.
Mësohet se në vendin e ngjarjes, për të zbatuar vendimin e shembjes së godinës tre katëshe, inspektorët e IMT-së kanë mbërritur të mbështetur nga forca policie.
Efektivët kanë qenë prezent në momentin që Muça ka shkuar në vendngjarje me armë në dorë. Në gjendje të dehur, ai ka nxjerrë pistoletën dhe ka qëlluar në drejtim të inspektorëve, kur ka parë që i ishte shembur banesa. Plumbi kapi një prej tyre, Ilrian Gavelli, i cili ndodhet në spital, jashtë rrezikut për jetën.
Më pas, në prani të forcave të policisë, Muça vijoi të qëllonte edhe në drejtim të një romi që kishte shkuar të mblidhte hekurat. Por plumbi kapi një mjet të parkuar aty pranë. Pas të shtënave të vazhdueshme, efektivët arritën ta neutralizonin 55-vjeçarin dhe ta vinin në pranga.
